لسان حال اصحاب الحسين عليه السلام

مجرشه
ــــــــــــــــــــ

احنه اصحابك يابو اليمه** بدمانه موقعين

طلگنه الدنيه ومابيهه ** من اجلك يحسين

لو نتگطع ** فلا نخضع ** من اجلك يحسين

********************

حبك سكن وسط الدمه ** بالگلب عندك صوره

نسحگ عله خشوم العده ** والروح الك منــذوره

رايات باسمك رفرفن ** باسمك تظل منصوره

كل واحد اوياك ارتبط ** واليـحب يوفي انذوره

نضحيلك كل گطره بدمنه ** متهمنه الاهــــــات

كلنه بصوت الهمه انادي ** من الذل هيهــــــات

لاما نركع ** فلا نخضع ** من اجلك يحسين

********************

منهاج للحق والعدل ** انته الشرف والغيره

دستور انته للفضل ** مومن سهـــــــل تغيره

القران خالقنه انزله ** وانته اصبحت تفسيره

ترخص الك روح ودمه ** ولنشوف عندك حيره

نفس الهمه ونفس الكلمه ** كل احنه بفد صوت

منهاب من جيوش الفاسق ** ميخوفنه المـــوت

لو نتصدع ** فلا نخضع من اجلك يحسين

**************

بالدنيه ما عدنه طمع ** مانرغب بدنيانه

تعاهدنه وياك بعهد ** واتوقع من دمانــــــه

عنك ابـــــد ما نبتعد ** بالروح انته ويانــه

انته الذي بيوم الوعد ** بالحشــــر تتلگانـه

عفنه التفكير بهـالدنيه ** بحسين التفكيــــــــــر

بها لموقف شفناهه الجنه ** وميهمنه شميصير

شمانتلوع ** فلا نخضع ** من اجلك يحسين

**********************

عفنه الاهل عفنه الولد ** حبك ابــد منعوفــه

منهاب من ابن الدعي ** ما نخشه من اسيوفه

بغيرتنه وبنهج الوصي ** بيهه نذل صفوفــه

شفناهه دار الاخره ** بعلم البصيره نشوفـــه

نصرخ ضد الباطل صرخه ** ونذل العدوان

ونصبح عبره الكل العالم ** تتحده الطغيان

لامرك نسمع ** فلانخضع ** من اجلك يحسين

************

ندري الاجل يومه اقترب ** واتوضحت سكراته

والباري بمحبتك فتح ** ياســـــــــــــيدي جناته

باجر نطب الموزمه ** بصولة علي وكراتـــــه

بالسيف نكتبلك شعر ** غيره اوفه ومضاتــــه

تشهد يم الزهره ادمانه ** وتشهد للاطــــــــــهار

خيرة الاصحاب احنه اصبحنه ** بالحب والايثار

شما تجمع ** فلا نخضع ** من اجلك يحسين